SHEKULLI

Filmi “Etja e Kosovës” e regjisorit Sunaj Raça, mori dje një ftesë zyrtare për të marrë pjesë në Konkursin Ndërkombëtar të Filmit, që zhvillohet në Palm Beach të Shteteve të Bashkuara të Amerikës nga data 20 -27 prill të këtij viti.

Regjisori Raça tha për gazetën “Shekulli” se “pjesëmarrja në këtë festival prestigjoz ndërkombëtar jo vetëm është një nder për kinematografinë Kosovare por edhe një barometër real i punës dhe ekipit të filmit”. Filmi “Etja e Kosovës” fokusohet tek pasojat e luftës në Kosovë.

Është një film i gjallë, plot temperament që sjell shumë emocione. Filmi ka tre linja kryesore, fundi i të cilave është tragjik. “Etja e Kosovës” u promovua në nëntorin e vitit të kaluar në Prishtinë. Regjisor i filmit prej 82 minutash është Sunaj Raça, njëherazi edhe skenarist i tij. Producent Sali Limani dhe Blerim Destani.

Në rolet kryesore interpretojnë Sheqerie Buçaj, Rajmonda Bulku, Tinka Kurti, Blerim Destani, Faruk Begolli, Ermela Teli, Bislim Muça dhe Meto Jovanovski. Festival i Filmit në Palm Beach është themeluar në vitin 1996 dhe çdo vit në pranverë mbledh mbi 30 mijë njerëz të artit. Në këtë festival përveç konkurrimit është mundësia e zhvillimit të një marketingu të madh për blerje filmash, si dhe për të thithur sponsorizime për projekte filmash të ardhshëm.

<<Kthehu prapa>>